Shakarim University-дің ұйымдастыруымен университетте Қарағанды қаласындағы “Qasym” баспа үйінің  кітап көрме-жәрмеңкесі  өтті. Жәрмеңкеде “Qasym” баспа үйі шығарған қазақ тіліндегі әдеби кітаптар  сатылды. 

Нарықта бес жыл жұмыс істеп келе жатқан баспадан бүгінге дейін әр түрлі жанрдағы 132 кітап басылып шыққан. Тек қазақ тілінде басылған баспа өнімдерінің ішінде қазақ және әлем әдебиетінің ұлы туындылары, ертегілер бар. Qasym kіtaphanasy сериясымен шығатын кітаптардың барлығының мұқабасы минималистік стильмен көркемделген.

“Qasym” баспа үйі Маркетинг және сату бөлімінің қызметкері Әділет Исабеков Семей жеріне ең таңдаулы, жастардың қызығушылығына сай деген 58 кітапты әкелгендерін жеткізді. Олардың ішінде Бауыржан Момышұлы, Мұхтар Әуезов, Жүсіпбек Аймауытов,  Әзілхан Нұршайықов, Шыңғыс Айтматов, Джек Лондон, Федор Достоевский т.б. жазушылардың кітаптары бар. Мұхтар Мағауин шығармаларының 26 томдық толық жинағын да осыннан табуға болады.

Әр қазақ баласы кітап оқыса, өзгелерден білекпен емес, біліммен озса, сапалы ұлт қалыптасса деген оймен әдебиет пен мәдениетті дәріптеп жүрген “Qasym” баспа үйінің жәрмеңкесінен университет  студенттері мен оқытушылары, сондай-ақ, қала тұрғындары кітап сатып алу мүмкіндігіне ие болды.