Мектепке жол мейірімнен басталады

Шәкәрім университетінің әлеуметтік серіктесі, Қазақстан банк жүйесі көшбасшыларының бірі – «Банк ЦентрКредит» (BCC) АҚ филиалы жаңа оқу жылының қарсаңында «Мектепке жол» акциясы аясында бірқатар білім беру мекемелері қызметкерлерінің балаларына қуанышты сәт сыйлады.

Бүгін банк тарапынан Шәкәрім университетінің оқытушылары мен қызметкерлерінің биыл алғаш мектеп табалдырығын аттағалы отырған бүлдіршіндеріне кеңсе тауарлары мен қажетті оқу құралдары салынған арнайы сыйлықтар табысталды. Бұл игі іс – әлеуметтік жауапкершіліктің айқын көрінісі ғана емес, сонымен қатар, білім беру саласына деген жанашырлық пен қолдаудың нақты мысалы.

Осындай қолдау шаралары  балалардың мектепке дайындық кезеңін жеңілдетіп қана қоймай, олардың ата-аналарына, яғни ұстаздар мен университет қызметкерлеріне моральдық демеу береді. Сонымен қатар, бұл – университет пен серіктес ұйым арасындағы сенімді қарым-қатынастың нығая түскенінің айғағы.

Университет ұжымы Банк ЦентрКредит филиалына алғыс білдіре отырып, алдағы уақытта да білім мен ізгілікті қолдауға бағытталған ортақ жобалардың жалғасын табатынына сенім білдіреді.