Shakarim University жастардың шығармашылық әлеуетін жетілдіріп, олардың бойындағы қабілетін дамыту үшін барлық жағдай жасалған. Осы ретте, бүгін Shakarim University «Shakarim JAS-STAR» өнер орталығының ашылу рәсімін өткізді. Рәсімге әр факультеттен жиналған өнерпаз студенттер бас қосты. Оқу үдерісінен тыс қоғамдық жұмыстардың іске асуын аталған өнер орталығы жүзеге асыратын болады.
Мемлекет басшысы «Ұлт мәдениеті – халық өмірінің айнасы. Еліміздің рухани дамуы ұлттық рухқа тікелей байланысты. Азаматтарымыздың рухы әрқашан биік болуы үшін мәдениетімізге, яғни руханиятымызға баса мән бергеніміз жөн» деген болатын.
Орталықтың негізгі мақсаты – жеке тұлғаның шығармашылық, рухани мүмкіндіктерін дамытуға жағдай жасау, салауатты өмір салтына берік дағдыларды қалыптастыру және студенттердің азаматтық-құқықтық және адамгершілік мәдениетін тәрбиелеу.
-Әр факультеттен жиналған дарынды студенттер аталған орталықта бiрiге жұмыс жасап, ұлттық құндылықтарымызды дәріптеп, өркениетті қоғам құру жолында, өнерлi жастар тәрбиелеу iсiнде еңбек етедi деген ниеттемiн. «JAS-STAR» өнер орталығы – университеттiң рухани қазынасын толтыруға, мәдениеті мен өнерін асқақтатуға қызмет ете берсін!- деді Әлеуметтік және тәрбие ісі жөніндегі проректор Мерей Ерболұлы.
Өнер орталығы құрамына келесі ұжымдар кіреді:
– Ақындар мектебi (ұлттық поэзиямызды насихаттау, жазба әдебиетінің жауhарларымен тыныстау);
– Әншілер тобы (дәстүрлі және эстрада нақышын сақтау, олардың кәсіби шеберліктерін дамытуға қолдау көрсету);
– Би мектебі (би ансамбльдерін құру, халық және заманауи билерді қою);
– «Qarakoz» театры (театралдық пьеса қойылымдары, әртістік өнерді зерттеп, үйрену);
– Имиджі топ;
– Аспаптар тобы (әртүрлі аспаптарда ойнау, ұлттық және әлемдік аспаптарды меңгеру).
Shakarim University – ғылымның шежіресi тұнған, халықтың асыл мұралары сақталған алтын көмбелі мекенi, жалынды жастардың өнермен сусындаған киелі ордасы.
Университеттiң киелі сахнасынан мәдениет майталмандары мен өнер тарландары түледі. Сол сара жолды жалғау – рухты жастардың борышы екендігі айқын. Жаңа орталыққа сәттілік тілейміз!
