Семей полигонының жабылуы — бейбітшілік жолындағы маңызды қадам!
1991 жылдың 29 тамызы — Қазақстанның тарихында ерекше орын алатын күн. Осы күні Семей ядролық сынақ полигоны жабылды. Бұл шешім әлемге бейбітшілікті сақтауға деген үлкен ұмтылысымызды танытты.
Бүгін Шәкәрім университетінің студенттері мен оқытушылары Бейбітшілік аралында өткізілген Семей ядролық сынақ полигонының жабылуына арналған іс-шараға қатысты. Жиналған қауым ядролық сынақтардың құрбандарына тағзым ретінде «Өлімнен де күшті...» монументіне гүл шоқтарын қойып, үнсіздікпен еске алды.
Бұл – тек еске алу емес, сонымен қатар бейбітшілік пен өмірдің құндылығын ұрпаққа жеткізу жолындағы маңызды қадам.
Семей полигонында жасалған 450-ге жуық ядролық жарылыс адамзат үшін орны толмас экологиялық және әлеуметтік зардаптарға әкелді. 1991 жылы полигонның жабылуы әлемдегі айтулы оқиғалардың біріне айналды. Қазақстан бұл қадаммен бүкіл әлемге бейбіт өмірдің маңыздылығын паш етті.
Shakarim University ғалымдары айналасына ажал уын сепкен сынақ полигоны жабылғаннан кейін ядролық сынақтардың салдарын зерттеу бойынша ауқымды жұмыстар жүргізді. Қазіргі таңда университеттің ғалымдары мен студенттері полигонның экологиялық зардаптарын, денсаулыққа әсері мен қоршаған ортаны қалпына келтіру жолдарын зерттеуде.
