«Таза Қазақстан» акциясы аясында ағаш отырғызылды

Бүгін Шәкәрім университетінің Шәкәрім жоғары колледжінің ұйымдастыруымен «Таза Қазақстан» республикалық экологиялық акциясы аясында кең көлемді ағаш отырғызу іс-шарасы өтті.

Оған Шәкәрім университетінің басшылық құрамы, «Семей орманы» мемлекеттік орман табиғи резерваты мамандары, колледждің оқытушылары мен студенттері қатысып, білім ордасының аумағындағы арнайы белгіленген орындарға жас көшеттер отырғызды.

Іс-шараның мақсаты – жасыл желекті көбейту, табиғатты қорғауға деген азаматтық жауапкершілікті арттыру және болашақ ұрпаққа экологиялық құндылықтарды аманаттау. Бұл игі бастама – табиғатты аялауға, экологиялық мәдениетті қалыптастыруға бағытталған.

Ағаш отырғызуға барлық қатысушылар белсене атсалысты. Сөйтіп, 10 шырша ағашы, 20 шетен, 35 алма, 5 терек көшеті егілді.

Ұйымдастырушылардың айтуынша, мұндай бастамалар тек көгалдандыру жұмыстарымен шектелмей, жастар арасында табиғатты аялау сезімін қалыптастыруға да ықпал етеді. «Әр отырғызылған ағаш – болашаққа жасалған инвестиция, ол таза ауамен қамтамасыз етіп қана қоймай, ұрпаққа жасыл мұра болып қалады»- дейді колледж директоры Тоты Әбдікәрімова.

«Таза Қазақстан» акциясы еліміз бойынша кеңінен өткізіліп келеді. Оның басты ерекшелігі – қоғамды бірлескен іс-шараларға жұмылдыра отырып, табиғатты қорғаудың нақты нәтижелеріне қол жеткізу. Шәкәрім жоғары колледжінің ұжымы бұл бастаманы қолдап қана қоймай, экологиялық мәдениетті дамытуға үлес қосып отырғанын көрсетті.

Аталған акция – елімізде қоршаған ортаны қорғауға арналған кең ауқымды бастамалардың бір бөлігі.