AP26100579 «Бройлер тауықтарындағы ақсақтықты көп факторлы талдау: Қазақстанның коммерциялық құс фабрикаларында патогендерді анықтау, қауіп факторлары және алдын алу стратегиялары»

Бройлерлердегі ақсақтық – әлемдік құс шаруашылығына айтарлықтай әсер ететін маңызды ауру болып қалып отыр. Бұл құбылыс жыл сайын миллиардтаған доллар шығынға әкеледі, себебі көптеген құс еті жарамсыз деп танылып, өндірістен шығарылады.

Алдын алу шараларын зерттеу мен осы аурудың микробиологиялық қоздырғыштарын анықтау саласында айтарлықтай жетістіктерге қол жеткізілгеніне қарамастан, әлемнің әртүрлі аймақтарындағы, әсіресе Орталық Азиядағы, бройлерлердің ақсақтық көрсеткіштері бойынша мәлімет пен статистикалық деректердің тапшылығы әлі де өзекті мәселе болып отыр.

Осы аймақтағы құс шаруашылығына соңғы жылдары салынған ірі инвестицияларды ескере отырып, бұл жобаның мақсаты – бройлерлердегі ақсақтықтың алдын алу мен оның таралуын азайту ісінде саланың дамуына пайдалы болатын тәжірибелік және қолданбалы білімнің берік негізін қалыптастыру.

Жоба Ақмола, Абай және Алматы облыстарында бройлер тауықтарының ақсақтық ауруының таралу деңгейін зерттеуге, бұл ауруды тудыратын бактериялық патогендерді анықтауға, сондай-ақ емдеу тәсілдерін бағалауға бағытталған. Зерттеу барысында құстардың күтіп-бағу жағдайлары, қоректендіру ерекшеліктері және ақсақтықтың дамуына әсер ететін өзге де факторлар талданады. Жобаның басты мақсаты — ақсақтықтың алдын алу мен емдеуді жетілдіруге арналған ұсынымдар әзірлеу. Бұл өз кезегінде құстардың аурушаңдығын төмендетіп, олардың денсаулығын жақсартуға және құс шаруашылығындағы өнімділікті арттыруға мүмкіндік береді. Зерттеу нәтижелері бройлерлердің саулығын басқару тәжірибесін оңтайландыруға және құс шаруашылығы кәсіпорындарының экономикалық тиімділігін арттыруға ықпал етеді.

Web of Science базасының Science Citation Index Expanded индекстелетін және (немесе) Scopus базасында CiteScore бойынша 65-тан (алпыс бестен) кем емес процентилі бар рецензияланатын ғылыми басылымдарда жобаның ғылыми бағыты бойынша кемінде 2 (екі) мақала және (немесе) шолу жарияланады;

ҒЖБССҚК ұсынған басылымдар тізбесінің 1-ші Тізіміне немесе 2-ші Тізіміне кіретін отандық немесе шетелдік ғылыми басылымда кемінде 2 (екі) мақала немесе шолу жарияланады.